ئەمساڵ 45 کەس لە کوردستانی سووریا بە هۆکاری جیاواز خۆیان کوشتووە، لەنێویاندا 23 پیاو، چوار منداڵ و ئەوانی دیکەش ژن بوون. هەر ئەمساڵ 15 هەوڵی خۆکوشتنیش شکستیان پێهێنراوە.
خراپیی دۆخی ئابووری یەکێکە لە هۆکارە سەرەکییەکانی زیادبوونی رووداوەکانی خۆکوشتن لە کوردستانی سووریا.
بەهۆی دۆخی شەڕ، نائارامیی، ئابووری و بێکاریی رێژەی خۆکوشتن لە رۆژئاوای کوردستان بەراورد بە ساڵی رابردوو زیادیکردووە. رێکخراوە کۆمەڵایەتییەکان کە لەنێو قامشلۆ دا کاردەکەن چەند ئامرێک لەو بارەوە ئاشکرا دەکەن.
بەپێی ئاماری فەرمی سووریا ، ئەو ناوچانەی لەژێر کۆنترۆڵی ئەواندان، ئەمساڵ 51 حاڵەتی خۆکوشتن هەبووە. ئەو ناوچانەیشی لەژێر دەسەڵاتی بەڕێوەبەرایەتیی خۆسەردان 45 کەس خۆیان کوشتوە، بەڵام ساڵی رابردوو 20 کەس خۆیان کوشتبوو. ئەو ناوچانەیشی لەژێر دەسەڵاتی ئۆپۆزیسیۆندان، بەهۆی نەبوونی رێکخراوی کۆمەڵایەتی هیچ ئامارێک نییە.
ئەڤین جومعە، بەڕێوەبەری کۆمەڵەی مافی مرۆڤ لە کوردستانی سووریا بە تۆڕی میدیایی رووداوی راگەیاند، 45 کەس خۆیان کوشتوە، 23 پیاو، 4 منداڵ و ئەوانی دیکەش ژن بوون. بەمەش ژمارەکە بۆ دوو بەرامبەر بەرزبووەتەوە.
سارا ناوی رێکخراوێکە کە کار بۆ ئەو کەسانە دەکات کە تووندووتیژییان بەرامبەر کراوە. سۆزان حوسێن، ئەندامی دەستەی بەڕێوەبەری رێکخراوی سارا بە رووداوی راگەیاند “ئێمە سەردانی ئەو کەسانە دەکەین کە تووندووتیژییان بەرامبەر دەکرێت، هۆکاری ئەو تووندووتیژییانەش بەهۆی شەڕ و پەنابەرییەوە بوو. لە تلتەمر و کۆبانێش هەبوون.”
بڵاوبوونەوەی چەک و فرۆشنی چەک لە سەردەمی شەڕدا هۆکاری ئەوەن، کە ژمارەی خۆکوشتن و کوشتن بەراورد بە ساڵانی رابردوو زیادبکەن.
بەپێی ئامارەکانی رێکخراوی تەندرووستیی جیهانی، سووریا لە ریزبەندی 176ەمین وڵاتدا دێت لەڕووی ئاماری خۆکوشتنەوە لە جیهاندا. بەپێی ئەو ئامارانەش کە تاوەکو ئێستا هەن لە ئەمساڵدا 51 کەس لە سووریا خۆیان کوشتووە.
هۆکارە سەرەکییەکانی خۆکوشتن لە سووریا
شەڕ و گرژییەکان
خراپیی دۆخی ئابووری
نەبوونی سەرچاوەی داهات و سەختیی دەستکەوتنی بژێویی ژیان
بڵاوبوونەوەی ڤایرۆسی کۆرۆنا و خراپتربوونی دۆخی ئابووری و بێکاری
ریزبەندی وڵاتان لە رووی خۆکوژی لەسەر ئاستی جیهان لە ساڵی 2019
لیتوانیا: لەنێوان هەر 100 هەزار کەسێک 32 کەس خۆیان کوشتووە
رووسیا: لەنێوان هەر 100 هەزار کەسێک 31 کەس خۆیان کوشتووە
گینیا: لەنێوان هەر 100 هەزار کەسێک 29 کەس خۆیان کوشتووە
کۆریای باشوور: لەنێوان هەر 100 هەزار کەسێک 27 کەس خۆیان کوشتووە
بیلاڕووسیا: لەنێوان هەر 100 هەزار کەسێک 26 کەس خۆیان کوشتووە
سورینەیم: لەنێوان هەر 100 هەزار کەسێک 23 کەس خۆیان کوشتووە
کیرگیزستان: لەنێوان هەر 100 هەزار کەسێک 22.5 کەس خۆیان کوشتووە
ئۆکرانیا: لەنێوان هەر 100 هەزار کەسێک 22 کەس خۆیان کوشتووە
لیسۆتۆ: لەنێوان هەر 100 هەزار کەسێک 21 کەس خۆیان کوشتووە
لاتیڤیا: لەنێوان هەر 100 هەزار کەسێک 21 کەس خۆیان کوشتووە
