من کچێکی خەڵکی مەهابادم. ساڵانێکە بە برینێکەوە دەژیم کە نە بە ڕووخسارمەوە دیارە و نە لە هەواڵەکاندا جێگەی دەبێتەوە. ئەم ڕۆژانە کاتێک بینیم پۆلیسی ئێران دوای بڵاوبوونەوەی ڤیدیۆی لێدانی کچێک لە تۆڕە کۆمەڵایەتییەکاندا، زۆر خێرا هاتە سەر خەت و تۆمەتبارەکەی دەستگیر کرد، لە لایەکەوە دڵخۆش بووم؛ چونکە هیچ ژنێک نابێت ببێتە قوربانیی توندوتیژی و هیچ ئازاردەرێک نابێت هەست بە ئارامی بکات، بەڵام لە لایەکی دیکەوە، گرێیەکی کۆن سەرلەنوێ گەرووی گرتم.
لەگەڵ خۆمدا گوتم مەگەر من ژن نیم؟ مەگەر کچانی کورد، کچانی هەمان ئەم نیشتمانە نین؟ بۆچی کاتێک نۆرە دەگاتە ئێمە، هەمووان بێدەنگی هەڵدەبژێرن؟
من گێڕانەوەی ئەو شتانەی بەسەرمدا هات بۆ دیدبانی مافەکانی مرۆڤی کوردستانی ئێران گێڕایەوە. وەک خۆم گوتم، چەند ساڵێک لە تەمەنم لەناو پارتی ئازادیی کوردستان (پاک) بەسەر برد؛ ساڵانێک کە هێشتاش لە بیرهێنانەوەیان دەترسم. گێڕانەوەکەم بڵاو کرایەوە و ڤیدیۆی قسەکانم لە کەناڵە پڕبینەرەکاندا دانرایەوە و دەیان هەزار کەس بینییان. کەواتە ئیتر هیچ کەسێک ناتوانێت بڵێت «ئاگادار نەبووین».
من سکاڵام تۆمار کرد. سکاڵاکەم لە ئێران تۆمار کرا. چوومە دادگای هەولێریش و لەوێش سکاڵاکەم خستە ڕوو، بەڵام دوای ئەوە چی ڕوویدا؟ هیچ کەسێک هەواڵی نەپرسیم. نە ڕۆژنامەنووسێک، نە بەرپرسێک و نە زۆرێک لەو کەسانەی کە هەموو ڕۆژێک باس لە مافەکانی ژنان دەکەن.
کاتێک لە ڕاگەیاندنەکاندا دەخوێنمەوە کە کۆمەڵگە بەرامبەر بە توندوتیژی دژی ژنان هەستیارتر بووە، لە خۆم دەپرسم: کام کۆمەڵگە؟ بەرامبەر بە کام ژنان؟ هەندێک جار هەست دەکەم هەستیاریی کۆمەڵگە زیاتر بۆ ئەو ژنانەیە کە لە شارە گەورەکان و ناوەندی وڵاتدا دەژین، بەڵام ئەگەر قوربانییەکە کچێکی کورد بێت و گێڕانەوەکەی پەیوەندی بە گرووپە چەکدارە کوردییەکانـەوە وەک پاک، کۆمەڵە، حیزبی دیموکراتی کوردستانی ئێران، پژاک یان خەباتـەوە هەبێت، لەپڕ هەمووان بێدەنگ دەبن؛ وەک بڵێیت ئازارەکانی ئێمە بەهایەکی کەمتریان هەیە.
من تەنیا یەک کەسم بەڵام تەنیا نیم. کچان و کوڕانێکی زۆر هەن کە بە گوتەی خۆیان هەرگیز باسی ئەزموونە تاڵەکانیان لەناو هەندێک لەم حیزبە چەکدارانەدا نەکردووە. هەندێکی دیکە گیانی خۆیان لەدەست داوە و ئیتر دەرفەتی گێڕانەوەیان نەماوە. هەندێکیشیان هێشتا لە ترسا بێدەنگییان هەڵبژاردووە.
بە بڕوای من، تا ئەو کاتەی ئەم گێڕانەوانە بە جدی وەرنەگیرێن و سەبارەت بە بانگەشەکانی قوربانیان لێکۆڵینەوەی سەربەخۆ و بێلایەنانە ئەنجام نەدرێت، دادپەروەری بۆ زۆرێک لە ئێمە تەنیا وشەیەک دەبێت. من لە حکومەتی هەرێمی کوردستانـیش گلەییم هەیە؛ چونکە پێم وایە ساڵانێکە ئەم حیزبانە لە خاکی هەرێمدا چالاکی دەکەن و قوربانیانیش چاوەڕێ دەکەن بەدواداچوون و وەڵامدانەوەیەکی کاریگەرتر بۆ سکاڵا و بانگەشەکانیان بکرێت.
من نامەوێت ئازاری هیچ کەسێک لەگەڵ ئازاری خۆمدا بەراورد بکەم. توندوتیژی لە هەر شوێنێک و دژی هەر ژنێک بێت سەرکۆنە دەکرێت. بەڵام ئاواتەخوازم هەمان هاوسۆزی و هەمان دادخواهی کە بۆ قوربانیانی دیکە دروست دەبێت، بۆ کچان و کوڕانی کوردیش بوونی هەبێت. ئاواتەخوازم ڕۆژێک خەڵکی ئێران، بێ گوێدانە نەتەوە و شوێنی نیشتەجێبوون، لە بەرپرسان داوا بکەن کە گوێ لە دەنگی قوربانیانی گرووپە چەکدارە کوردییەکانـیش بگرن و ڕێڕەوی بەدواداچوون بۆ سکاڵاکانیان بە جدی بگرنە بەر.
من ئەمڕۆ تەنیا باسی خۆم ناکەم. باسی سەرجەم ئەو کچانە دەکەم کە هێشتا ناوێرن گێڕانەوەکانیان باس بکەن. باسی ئەو کوڕانە دەکەم کە ساڵانێکە بە مۆتەکەی ڕابردووەوە دەژین. باسی ئەو خێزانانە دەکەم کە چاوەڕێی هاتنەدیی دادپەروەرین.
ئەگەر بڕیارە هیچ ژنێک لە ئێران قوربانیی توندوتیژی نەبێت، دەبێت ئەم ئاواتە لە تارانەوە تا مەهاباد و لە هەر شارێکی گەورەوە تا هەر گوندێکی سنووری، وەک یەک بێت. دادپەروەری ئەو کاتە مانای هەیە کە جیاوازی لە نێوان ناوەند و پەراوێزدا نەکات.
من هێشتا هیوادارم ڕۆژێک بێت کە کەس لێم نەپرسێت خەڵکی کوێیت؛ تەنیا بپرسێت چیت بەسەردا هاتووە و چۆن دەتوانین دادپەروەریت بۆ داوا بکەین.
