«ببنە دەنگی دادپەروەری؛ تریبۆنێک بۆ ڕاستییەکانی کوردستان»
چاودێری مافەکانی مرۆڤی کوردستانی ئێران (IKHRW.com) بە ئامانجی پەرەپێدانی بەشداریی هاوڵاتیان لە بەڵگەدارکردن و بەدواداچوونی حاڵەتەکانی پێشێلکردنی مافەکانی مرۆڤ، بەشێکی نوێی بە ناونیشانی «ناردنی ڕاپۆرتەکانی مافی مرۆڤ» لە ماڵپەڕی فەرمی خۆیدا دامەزراند.
ئەم سیستەمە نوێیە بە هاوڵاتیان، چالاکوانانی مەدەنی، ڕۆژنامەنووسانی خۆجێیی، بنەماڵەی قوربانیان و تەواوی ئەو کەسانەی کە شاهید یان ئاگاداری حاڵەتەکانی پێشێلکردنی مافەکانی مرۆڤن لە ناوچە کوردنشینەکاندا، ئەم دەرفەتە دەدات کە ڕاپۆرت، تێبینی و بەڵگەنامەکانی خۆیان بە شێوەیەکی ڕاستەوخۆ و ئەمن بۆ تیمی چاودێری بنێرن.
بەپێی ڕاگەیەندراوی چاودێری مافەکانی مرۆڤی کوردستانی ئێران، ئامانج لە دروستکردنی ئەم بەشە، بەهێزکردنی تۆڕی ڕاپۆرتدەرانی جەماوەری و دابینکردنی سەکۆیەکی ئەمنە بۆ تۆمارکردن و بەڵگەدارکردنی ڕاستییە مەیدانییەکان. ڕاپۆرتە وەرگیراوەکان دوای پێداچوونەوە و ڕاستکردنەوە لەلایەن تیمی دەستەی نووسەران و توێژینەوەی چاودێرییەوە، لە ئەگەری بەدیهاتنی پێوەرە پیشەیی و مرۆییەکان، لە چوارچێوەی ڕاپۆرت، هەواڵ، وتار یان دۆسیەی بەڵگەنامەیی بڵاو دەکرێنەوە.
چاودێری جەختی کردووەتەوە کە زۆرێک لە حاڵەتەکانی پێشێلکردنی مافەکانی مرۆڤ، بەتایبەت لە ناوچە دوورەدەستەکان و ئەو شوێنانەی کە کەمتر ڕووماڵ دەکرێن، تەنیا لە ڕێگەی بەشداریی ڕاستەوخۆی هاوڵاتیان و شاهیدحاڵەکانەوە شیاوی تۆمارکردن و بەدواداچوونن. بەم هۆیەشەوە، ئەم دامەزراوەیە داوا لە سەرجەم هاوڵاتیانی کورد دەکات کە لە بەڵگەدارکردنی ڕاستییە مەیدانییەکاندا ڕۆڵێکی چالاکتر بگێڕن.
بەکارهێنەران هەروەها دەتوانن وتار و شیکارییەکانی خۆیان دەربارەی بابەتە کۆمەڵایەتی، مەدەنی و مافەکانی مرۆڤ بە ناوی ڕاستی یان خوازراوەوە بۆ بڵاوکردنەوە بنێرن.
چاودێری مافەکانی مرۆڤی کوردستانی ئێران پێی وایە کە بەرگریکردن لە مافەکانی مرۆڤ تەنیا ئەرکی دامەزراوە پسپۆڕییەکان نییە، بەڵکوو بە بەشداریی هاوڵاتیان و تۆمارکردنی وردی ڕاستییەکان، دەکرێت یارمەتی زیادبوونی شەفافیەت، وەڵامدەرەوەیی و هۆشیاریی گشتی بدرێت. لەمەودوا، هەر هاوڵاتییەک دەتوانێت لە پێگەی ڕاپۆرتدەرێکی مافی مرۆڤدا، ببێتە دەنگی قوربانیان و ڕەنگدانەوەی ڕاستییەکانی کۆمەڵگەکەی خۆی بێت.
لینکی ناردنی ڕاپۆرتەکانی مافی مرۆڤ:
سیستەمی ناردنی ڕاپۆرتەکانی مافی مرۆڤی چاودێری مافەکانی مرۆڤی کوردستانی ئێران
