هاوكات لەگەڵ زیادبوونی باسوخواسەکان سەبارەت بە داواکارییەکانی ڕادەستکردنەوە، ئاگادارکردنەوە سوورەکانی ئینتەرپۆل (Red Notices) و بەدواداچوونی دادوەریی هەندێک لە ئەندامان و سەرکردەکانی حیزبە چەکدارەکانی کوردی ئێرانی، خوێندنەوەی دووبارەی هەڵوێستێکی فەرمی لە لایەن پۆلیسی هەرێمی کوردستانی عێراقەوە دەتوانێت یارمەتیدەر بێت بۆ ڕوونکردنەوەی ڕەهەندە یاساییەکانی ئەم بابەتە.
لە گەلاوێژی ١٤٠٤ (ئابی ٢٠٢٥)، کارزان ئەمیرغەفووری، گوتەبێژی بەڕێوەبەرایەتیی گشتیی پۆلیسی هەرێمی کوردستان، لە دیمانەیەکدا لەگەڵ تۆڕی میدیایی Channel8 ڕایگەیاند کە پۆلیسی هەرێم لە چوارچێوەی ئەرکە یاساییەکانی خۆیدا هاوکاری و هەماهەنگیی تەواوی لەگەڵ پۆلیسی فیدراڵیی عێراق و ڕێکخراوی نێودەوڵەتیی پۆلیسی تاوانکاری (ئینتەرپۆل) هەیە. ئەم لێدوانانە لە کاتی بڵاوبوونەوەیاندا، بەشێک بوون لە ڕوونکردنەوە فەرمییەکانی پۆلیس سەبارەت بە چۆنیەتیی هاوکاری لە نێوان دامەزراوە ئینتزامییەکانی عێراقدا، بەڵام بە سەرنجدان بە گۆڕانکارییەکانی ئەم دواییانە و زیادبوونی باسوخواسەکان لەسەر بەدواداچوونە دادوەرییە فرەسنوورەکان، جارێکی دیکە جێگەی سەرنجی زۆر بوونەتەوە.
لە ڕوانگەی یاسای نێودەوڵەتییەوە، هاوکاری لەگەڵ ئینتەرپۆل بە مانای دەستبەسەرکردن یان ڕادەستکردنەوەی خۆکارانەی کەسەکان نییە. ئاگادارکردنەوەی سووری ئینتەرپۆل داواکارییەکە بۆ دەستنیشانکردنی شوێن و دەستبەسەرکردنی کاتیی کەسی داواکراو، تا لە حاڵەتی بوونی مەرجە یاساییەکاندا، ڕەوتی ڕادەستکردنەوە یان ڕێکارە دادوەرییەکانی دیکە تاوتوێ بکرێن. بڕیاری کۆتایی سەبارەت بە دەستبەسەرکردن، ئازادکردن یان ڕادەستکردنەوەی هەر کەسێک، لەسەر بنەمای یاسا ناوخۆییەکانی ئەو وڵاتەی کە کەسەکەی لێیە و بە بڕیاری ناوەندە دادوەرییەکانی هەمان وڵات دەدرێت.
لە عێراقیشدا، پەیوەندیی فەرمی لەگەڵ ئینتەرپۆل لە ڕێگەی نووسینگەی ناوەندیی نیشتمانیی ئینتەرپۆل لە بەغدا ئەنجام دەدرێت و هاوکاریی دامەزراوە ئینتزامییەکانی ئەم وڵاتە، لەوانەش هەرێمی کوردستان، لە چوارچێوەی سیستەمی یاسایی عێراقدا بەڕێوە دەچێت. بەو هۆیەشەوە، هەر جۆرە داواکارییەکی نێودەوڵەتی یان دۆسیەیەکی خاوەن ڕەهەندی فرەسنوور، جیا لە هاوکاریی پۆلیسی، پێویستی بە تێپەڕاندنی ڕێوشوێنە دادوەری و یاساییەکان هەیە.
لە هەفتەکانی ڕابردوودا، بابەتی داواکارییەکانی ڕادەستکردنەوە و ئاگادارکردنەوە سوورەکان دژی ژمارەیەک لە ئەندامان و سەرکردەکانی گرووپە چەکدارەکانی کوردی ئێرانی جارێکی دیکە لە میدیاکان و کەشوهەوای گشتیدا هاتووەتە ئاراوە. لە بەرامبەردا، هەندێک لەو کەس و گرووپە ناوهێنراوانە گومانیان لە دروستیی ئەم ڕێکارانە کردووە. جیا لەم جیاوازیی بیروڕایانە، لێدوانە فەرمییەکانی پۆلیسی هەرێم نیشانی دەدەن کە بنەمای هاوکاری لە نێوان پۆلیسی هەرێم، پۆلیسی فیدراڵیی عێراق و ئینتەرپۆلدا، بەشێکە لە سیاسەتی ڕاگەیەندراوی ئەم دامەزراوەیە.
لە پاڵ مافەکانی تۆمەتباراندا، مافەکانی قوربانیانیش بەشێکی جیانەکراوەن لە سیستەمی دادپەروەری. ئەو کەسانەی کە دەڵێن بەهۆی کارەکانی گرووپە چەکدارەکانەوە زیانیان پێگەیشتووە، مافی خۆیانە کە دۆسیەی سکاڵا تۆمار بکەن، داوای لێکۆڵینەوەی سەربەخۆ، ڕاگرتنی کاریگەر و مافی دادخوازی بکەن. بەدیهاتنی ئەم مافانە پێویستی بەوەیە کە دۆسیەکان لەسەر بنەمای بەڵگەکان، بەبێ ڕەچاوکردنی تێبینییە سیاسییەکان و لە چوارچێوەی یاسادا لێکۆڵینەوەیان لێ بکرێت.
لە بارودۆخێکی وەهادا، ئەوەی لە هەر شتێک زیاتر گرینگە، پابەندبوونی هەموو دامەزراوە بەرپرسەکانە بە سەروەریی یاسا، شەفافییەت لە ڕەوتی لێکۆڵینەوەدا و ڕێزگرتنی هاوکات لە مافەکانی قوربانیان و تۆمەتباران. هەڵوێستی ڕاگەیەندراوی پۆلیسی هەرێمی کوردستان سەبارعت بە هاوکاری لەگەڵ پۆلیسی فیدراڵیی عێراق و ئینتەرپۆلیش دەبێ لەم چوارچێوە یاساییەدا و بەدوور لە ململانێ سیاسییەکان هەڵسەنگاندنی بۆ بکرێت.
