مەهسا، یەکێک لە ئەندامانی جیابووەوە لە حزبی پاک، لە ڤیدیۆیەکی هەشت خولەکیدا کە لە ماڵەکەی خۆیدا تۆمارکراوە، باسی لەو ئەشکەنجە و بێڕێزییانە کرد کە خۆی و ئەندامانی دیکە لەم حیزبەدا ئەزموونیان کردووە. دەموچاوی مەهسا بەمەبەستی پاراستنی ژیانی خۆی و بنەماڵەکەی داپۆشراوە و دەنگیشی گۆڕدراوە. ناوەکەشی وەک نازناوێک هێنراوە تا ئەمنییەتەکەی مسۆگەر بکرێت.
لەم گفتوگۆیەدا، مەهسا بۆ یەکەمجار، حاڵەتەکانی دەستدرێژی و خراپ بەکارهێنانی سەرکردەی حزبی پاک دژی ژنان دەگێڕێتەوە. ئەم ئاشکراکردنانە تا ئێستا بەم ڕاشکاوییە بڵاونەکرابوونەوە. وەشانی سەرەکیی ڤیدیۆکە لە لایەن ڕێکخراوی چاودێری مافەکانی مرۆڤی کوردستانی ئێران (IKHRW)ەوە پارێزراوە و لە کاتی پێویستدا، بە ڕەچاوکردنی تەواوی حەرەمی تایبەتی، دەکرێت بخرێتە بەردەست توێژەران و یاساناسان.
مەهسا لەم گفتوگۆیەدا هەروەها جەختی لەسەر ئارەزووی خۆی بۆ بەردەوامبوونی ژیان و پاراستنی گیانی کردووەتەوە. لە کاتی تۆمارکردنی ڤیدیۆکەدا، ئەو دووگیان و خێزاندار بوو، بەڵام سەرەڕای بارودۆخی سەخت، ئازایانە ئامادە بوو ئەزموونەکانی خۆی لە توندوتیژی و پێشێلکردنی مافەکانی مرۆڤ لە ناو حزبی پاکدا بەیان بکات.
ئەم ڤیدیۆیە، ڕوانینێکی بەڵگەنامەیی بۆ ئەزموونی کەسانی ناو حیزبە چەکدارەکان فەراهەم دەکات و دەنگی مەهسا وەک یەکێک لە ڕزگاربووان، دەرفەتی لێکۆڵینەوە لە ڕەهەندە مرۆیی و مافەکانی مرۆڤی ئەم بابەتە بۆ کۆمەڵگەی نێودەوڵەتی و دامەزراوەکانی مافی مرۆڤ دەڕەخسێنێت.
