ئەمڕۆ سێشەممە ٧ی تشرینی یەکەمی ٢٠٢٥ بە ڕاگەیاندنی ئاگربەستی دەستبەجێ و هەمەلایەنەی نێوان حکومەتی سوریا و هێزە کوردییەکان (قەسەدە)، شەڕ و پێکدادانەکانی شەوانە لە گەڕەکە کوردنشینەکانی شاری حەلەب، کە بووە هۆی کوژران و برینداربوونی چەند کەسێک، لەنێویاندا هاووڵاتی مەدەنی، کۆتایی هات. وێڕای گێڕانەوەی ئارامیی ڕێژەیی بۆ ناوچە جێناکۆکەکان، ئاگربەستەکە جارێکی دیکە گرنگی جێبەجێکردنی ڕێککەوتنی تێکەڵکردنی هێزە کوردییەکان لە دامەزراوەکانی حکومەتدا وەک کلیلی سەقامگیری لە باکوری سوریا، خستەڕوو.
شەوی ڕابردوو گەڕەکی شێخ مەقسوود و ئەشرەفیە لە شاری حەلەب شایەتی پێکدادانی توندی نێوان هێزەکانی حکومەت و هێزەکانی قەسەدە بوون. بەپێی زانیارییەکان، لانیکەم ئەندامێکی هێزە ئەمنییەکان و چەند کەسێکی مەدەنی کوژراون و ژمارەیەکی دیکەش برینداربوون. هەروەها بەشێک لە باڵەخانەکان و ژێرخانی خزمەتگوزارییەکان زیانیان بەرکەوتووە، هەروەها بۆ ماوەی چەند کاتژمێرێک دەرگای چوونە ژوورەوە بۆ گەڕەکەکان گیراوە.
ڕێککەوتن بۆ ئاگربەستی دەستبەجێ
دوای چەندین کاتژمێر لە شەڕ، ناوبژیوانانی ناوخۆیی و نوێنەرانی وەزارەتی بەرگری سوریا توانیان هەردوولا ڕازی بکەن بە ئاگربەستێکی دەستبەجێ و هەمەلایەنە. بەگوێرەی ڕێککەوتنەکە هیچ کام لە لایەنەکان بەبێ هەماهەنگی هیچ هەنگاوێکی سەربازی نوێ ناگرنەبەر و بارودۆخی سەر زەوی دەگەڕێتەوە بۆ دۆخی پێش ململانێ.
فەرماندەیی قەسەدە ڕایگەیاند؛
“ئامانجمان پاراستنی گەل و ڕێگریکردنە لە خوێنڕشتنی زیاتر، پابەند دەبین بە ئاگربەستەوە”.
هەروەها سەرچاوەیەکی سەربازی سوریا ڕایگەیاند؛
“سوپای سوریا هەوڵدەدات سەقامگیری و سەروەری وڵاتەکەی بپارێزێت و ڕێگە نادات هیچ گروپێک نەزمی گشتی تێکبدات”.
زەمینەی سیاسی و گرنگی ڕێککەوتنەکە
گرژییەکانی ئەم دواییە لە کاتێکدایە کە ڕێککەوتنی مانگی ئازاری 2025ی نێوان حکومەتی سوریا و سەرکردایەتیی (قەسەدە) هێشتا بە تەواوی جێبەجێ نەکراوە. بەپێی ڕێککەوتنەکە، بڕیار بوو هێزە کوردییەکان بخرێنە ناو پێکهاتە ئەمنی و کارگێڕییەکانی حکومەتەوە، بەڵام ناکۆکی لەسەر بەرپرسیارێتی و کۆنترۆڵکردنی ناوچەکانی ماوەتەوە، گرژییە ناوخۆییەکانی زیاتر کردووە.
کاردانەوەی نێودەوڵەتی
نوێنەرایەتی نەتەوە یەکگرتووەکان لە دیمەشق و چاودێرانی ڕووسیا جەختیان لە پابەندبوونی لایەنەکان بە ئاگربەست و کەڵک وەرگرتن لە کەناڵی وتووێژ کردەوە. هەروەها هاتوچۆی گەڕەکەکان ئاسایی بووەتەوە.
هەرچەندە ئاگربەستی ٧ی ئۆکتۆبەری ٢٠٢٥ توانی ڕێگری لە تەشەنەسەندنی توندوتیژی بکات، بەڵام شرۆڤەکاران هۆشداری دەدەن کە تا جێبەجێکردنی تەواوی ڕێککەوتنی تێکەڵکردنی قەسەدە لە پێکهاتە فەرمییەکانی حکومەتدا، پێدەچێت گرژیی هاوشێوە بەردەوام بێت. ئەم ڕووداوە جارێکی تر نیشان دەدات کە سەقامگیری باکوری سوریا بە ناسک و وابەستەی ئیرادەی سیاسی لایەنەکان دەمێنێتەوە.
